Pageviews all the time

INYANDIKO ZO MU BUBIKO. Akaduruvayo n’amakimbirane Minisitiri MUSONI James wa MINALOC akomeje kubiba muri A.D.E.P.R afatanyije na Perezida Paul KAGAME bikomeje guca ibintu muri iri idini ubu risigaye ku izina gusa aho ryabaye indiri ya SEKIBI kandi ryitirirwa MWUKA WERA!!!/ BWIZA M.

Iyi nyandiko yahise bwa mbere kuri SHIKAMA kuri 31/1/2014

Musoni James ntaho adashakira icya cumi cya FPR
No muri ADEPR agerayo!
ADEPR,  idini ryageze mu Rwanda nyuma ya Kiliziya Gatolika rikabanza za Gihundwe muri Cyangugu, idini ryadukanye umuriro mwinshi abarisengeramo bitwaza amabibiliya matoya y’imikara, idini risengerwamo n’abambara amajipo akorakora ku birenge n’ibitambaro bipfutse umutwe wose abantu bakabita abarokore, idini rirangwa n’urusaku rwinshi rw’urusobe rw’ibyuma nk’amapendo babyaza umuziki barimo gusenga; wa mwanzi SHITANI rihora risenga ryamagana, ubu rigeze aho ashaka n’aho umwana arira nyina ntiyumve.
  

Iyobokamana rikozwe neza rigirira akamaro umutima wa ba nyir’ugusenga, iyo bishobotse n’igihugu kibyungukiramo kuko abantu bubaha Imana babasha no kubahiriza gahunda za Leta mu buryo bworoshye.
Mu minsi yashize twigeze kubagezaho inkuru kuri uru rubuga rwanyu SHIKAMA mukunda muri benshi ivuga kuri ADEPR. Iri dini ubundi ryitwa Impuza-mashyirahamwe y’Amatorero agendera kuri Roho Mutagatifu cyangwa umwuka wera.

Muri iyo nyandiko twavugagamo ukuntu FPR yaryeguriye abanyamurenge kugira ngo ikomeze ibahume amaso ibabuze gutaha iwabo kuko ari iturufu izabashoboza gukomeza gusahura igihugu cy’abaturanyi cya Repubulika Ihaanira Demukarasi ya Kongo-Kinshasa.

Ikindi twavugaga muri iyo nkuru cyari uko uwari umuyobozi w’iryo dini witwaga Pasiteri USABWIMANA Samuel, FPR yamukuyeho mu buryo budasobanutse ikanategeka abakirisitu bagenzi be kumushinja ibyaha by’ibihimbano bimuhanisha gucibwa mu itorero no guhama mu rugo nk’uhafungiye mbese ntabashe kujya mu rusengero guhimbaza Imana no kuvuza ipendo nk’abandi barokore bose.

Muri ayo macenga n’induruburi bya Politiki bimira idini mu Rwanda, Pasiteri  USABWIMANA Samuel ubu ufungiye iwe mu rugo nk’uko nabivuze yasimbujwe Pasiteri SIBOMANA Yohani. Uyu SIBOMANA n’ubundi yigeze kuba umwe mu bayoboye iri dini ariko nabwo yabaye igikoresho cyo kuzana umwuka mubi bamuvanaho kuko icyo gihe yari yagaragaje ubushobozi bucye mu kuyobora.

Amakuru dufite akaba yerekana ko amacakubiri arimo kugaragara muri iri dini ry’abapenekote ahemberwa na Minisitiri James MUSONI uyobora Minisiteri y’Ubutegetsi bw’igihugu, imiyoborere mibi, amajyanyuma rusange n’imibereho mibi y’abaturage. Ibi MUSONI abikora ku mabwiriza ya Shebuja Kagame ku mpamvu turi busobanure mu kanya.

 Nk’uko RPF na Kagame bagiye bakongeza umuriro mu gusenya abatavuga rumwe na bo, ni nako barimo kubigenza mu gusenya itorero rya ADEPR. Ni muri urwo rwego rero bibasiye Pasiteri USABWIMANA Samuel, bamusebya bamwangisha abakirisitu (Abarokore) babapakiramwo ko ngo afite ibitekerezo by’ubuhezanguni bishingiye ku moko. Nyamara umugambi ukaba ari wa wundi wa Perezida Kagame wo kwigizayo abantu bose batagendera mu ntore ze.

Iki kikaba ari ikinyoma kuko, Pasiteri USABWIMANA Samuel, umututsi warokotse akarokokera mu Biryogo , Nyakabanda i Kigali ari ikinyoma cyambaye ubusa kuko umugambi ubaye uwo kwigizayo abahezanguni Kagame yagombye guhera ku bamwegereye cyane kandi babushabushe abaturage. Muri abo barimo Dr Senateri Antoine MUGESERA,
Musenyeri Onesphore RWAJE wanakomye amashyi y’urufaya ubwo Kagame yavugaga ko azarimbura imbaga nyarwanda muri za ngirwa-masengesho zabereye muri Kigali Serena Hotel, abahezanguni kandi barimo na Musenyeri BONYINTEGE Smaragde ubanza kukureba ku zuru iyo mugiye kuvugana cyangwa muhuye, barimo Pasiteri Antoine RUTAYISIRE uherutse kuvuga mu nama yari yamuhuje n’abanyamakuru ko yigeze kwifuza icyarimbura abahutu kandi akakigiramo uruhare, n’abandi tutabona impapuro tubandikaho muri iyi nkuru. 

Nyamara ahubwo birazwi neza kandi cyane ko Pasitoro USABWIMANA Samuel ubusanzwe ari umusaza w’imfura n’imico myiza kandi ucisha make wagaragaje ubutwari bwo kwamagana amacakubiri yari yaramunze akamugaza ADEPR mbere y’uko atorerwa kuyibera umuvugizi mukuru.

Ubu rero ADEPR imaze kuba ikibazo ku mitima na roho by’abayisengeramo no ku muryango nyarwanda muri rusange kubera ko intore Kagame yoherezamo zamaze kurihindura nk’akarima k’urusange aho buri wese akora ibyo ashaka kandi akabikorana n’agasuzuguro. Uwo Pasiteri SIBOMANA Yohani yagiyeho kugira ngo abe igikoresho cya Kagame na Minisitiri Musoni.

Umuvugizi wa ADPER mu Rwanda, Pasitori Sibomana Jean, arasaba abayoboke biryo torero kwiyubakira igihugu.
Sibomana Yohani
Kagame na Musoni barashaka amaturo n’inkunga bya ADEPR biva muri Suwede
Iteka mpora nibuka ijambo ryavuzwe na Nyakubahwa Perezida Daniel Arap Moi wigeze kuyobora Kenya, hari abantu tujya tuganira bakambwira ko bakiri mu ishyamba Kagame yajyaga ababwira ko ahantu hose hazaba hashobora kubyara ifaranga uko hazaba hameze kose, ayo mafaranga azaba aya FPR ku kiguzi icyo aricyo cyose none koko niko birimo kugenda.

Gusa ikitarakozwe Kagame yari yarabemereye nyuma akaza kubakwepa ni ukuyasaranganya ku bayoboke ba FPR kuko ubu yikubiwe n’agatsiko gato cyane k’abantu batarenga makumyabiri barimo na Kagame nyir’igihugu hamwe na Musoni utegeka MINALOC. Ni muri uru rwego ADEPR ihabwa inkunga nyinshi cyane zivuye mu baterankunga bityo bakaba bashaka kubanza kuryaho icya cumi.

Ibi rero ntibyashoboka batiyegereje umuyobozi mukuru w’idini. Kugira ngo bamwiyegereze bagomba gushyiraho uzabapfukamira ibyo gukorera Imana n’umukumbi wayo bikagenda nka nyomberi. Umutungo wa ADEPR twabibutsa ko ukomoka ku maturo abarokore batura mu nsengero hakiyongeraho inkunga ziva muri Norvege na  Suwede  

Pasiteri Usabwimana wahuye n'inyundo ya FPR
Afungiye iwe nka Birofa wo ku ruzi rw'iwabo wa Kinani
Mu nama yo gusoza umwiherero yabaye ku itariki ya 08/12/2012, n’uburyarya bwinshi, Perezida KAGAME yashimiye itorero rya ADPR n’abanyamuryango baryo kubera ibikorwa byiza bagezeho, ariko ntibyamubujije gukomeza gucengeza amacakubiri muri aba banyamuryango ubwabo. Ntabwo rero bitangaje kubona Pastori Samuel USABWIMANA na bagenzi be bitorewe n’abakirisitu, beguzwa, bagasimbuzwa inkomamashyi za Kagame.

ADEPR yatumije inama ihinduka imyigaragambyo Mutakwasuku na Musoni baza gushungera
Mu nama rusange y’abashumba b’itorero rya ADEPR, yari yahuje abapasiteri baje bahagarariye amaparuwasi n’indembo zoze mu mpande zose z’igihugu, tariki ya 03/02/2012, ku rusengero rwa ADPR-Nyabisindu mu karere ka Muhanga mu mujyi wa Gitarama, habaye ukutumvikana ndetse n’imyigaragambyo hagati y’abashumba b’iri torero.

Muri iyo nama habayemo udushya aho haje n’abantu biyitaga abashumba cyangwa abapasitoro bavugaga ko bayobora za paruwasi za ADEPR nyamara bari boherejwe na FPR kugira go baze kuvangira abayoboye inama. Minisitiri Musoni na Meya wa Muhanga MUTAKWASUKU Yvone nabo bari baje gushungera iyo myigaragambyo kugira ngo berekane ko koko iryo dini nta kigenda ndetse rikeneye inkunga ya Leta cyangwa guseswa bibaye ngombwa.

Iyi myigaragambyo yabaye mu rwego rwo kureba ukuntu bakwikiza Pasitori USABWIMANA Samuel utajya na rimwe avugirwamo na Kagame cyangwa n’abambari be. Iyi mbuto y’urwango n’amacakubiri Kagame na Minisitiri MUSONI James barimo kubiba mu bana b’abanyarwanda, amaherezo izabagaruka.
Mu by’ukuri hatabayeho kwihenda no kubogama, Pasiteri USABWIMANA Samuel ni intwari yo gushimwa kuko yanze kuvugirwamo na KAGAME ushaka gusenya itorero ry’Imana ubu ryabaye iry’agatsiko ka bamwe. Imana ikomeze kumurinda.

Ubu rero harimo kuvugwa indi bombori bombori muri iri dini ituruka ku kutumvikana hagati y’uwashyizweho n’ibyegera bye birimo kugerageza kubahiriza amategeko biburizamo amategeko mahimbano ye bikaba bitumvikana ukuntu bizagenda ngo iri dini ribone ituze n’amahoro bityo ribashe kubona ubwashorera umukumbi mu ngoma y’ijuru. Ibi byose biraterwa n’inda nini yasumbye indagu.

Mu gusoza iyi nkuru SHIKAMA turatanga umusanzu wacu twemeza ko amadini adashobora kuvangwa n’ibikorwa bya politiki ngo bigire icyo bigeza ku baturage n’igihugu muri rusange. N’iyo bishobotse ikivamo ni umwiryane no guca abantu mo ibice. Leta niharire ADEPR uburenganzira bwayo yishyirireho abayiyobora nibibananira bazamenye n’uko babibonera ibisubizo ariko hatajemo igitutu, igitugu, igitutu na munyangire bya Leta.

Muri SHIKAMA twifatanije n’abakirisitu bo muri ADEPR mu Rwanda basenga Imana batayiryarya uhereye mu Gakinjiro i Kigali ku cyicaro gikuru, ugaca i Gihundwe, ugaca i Nyabisindu i Gitarama, ukanyura i Bugesera mwubatseyo n’ibitaro, ugaca i Gahogo hakurya ya Kabgayi naho muri Gitarama n’ahandi mufite za Paruwasi. Nimukomere mwihangane kandi musenge ubutarambirwa Imana izumva gutakamba kwanyu.
Gusa mumenye kandi muzirikane ko niba idini ryanyu ryemerwa n’Imana nta kizarisenya ariko nimucurangurira mu mubiri Sekibi azabogeraho uburimiro musange murutwa n’abatajya mu rusengero na busa. 

BWIZA M.
Shikamaye.blogspot.no 
Shikama Ku Kuri na Demukarasi(SKUD)

No comments:

Post a Comment

Muvandimwe, nshuti ya SHIKAMA, turagushimira cyane umuganda utanga wo kubaka URWANDA rushya ubinyujije mu bitekerezo byawe( Komanteri). Kugirango turwanye urukungu rw'Agatsiko ni ngombwa ko buri komanteri ibanza gusuzumwa. Yohereze, irahita ijya ku rubuga mu minota mike niba idatandukira( kuvuga ibitajyanye n'inyandiko), itukana, cyangwa yuzuyemo uburere buke.

Wipfusha komanteri yawe ubusa ukoresha "ANONYMOUS", himba izina urikomeze kuko hari ibihembo mu Kuboza 2016 ku bantu 3 bazaba babaye indashyikirwa mu gutanga ibitekerezo. Dukomeje kubashimira ubwitange n'umurava muhorana. IMANA Y'I RWANDA ihorane namwe iminsi yose.

Dg NKUSI Yozefu
www.shikamaye.blogspot.com
Uharanire ko Ukuri gusimbura ikinyoma.
Email: mahoriwacu@gmail.com; tel: +4745564355