Pageviews all the time

Rwanda.Taliki 31 Mutarama 2014, abategetswe guhinga imiceri mu gishanga cya Rugeramigozi i KABGAYI beretse Guverineri MUNYANTWARI Alphonse gihamya y’uko inzara iri ku isoko i GITARAMA ikomoka kuri politiki ya KAGAME yizwe bunyeshyamba maze akorwa n’ikimwaro imbere y’ababyeyi babaye imigata kubera inzara, bafite uburimiro, ingutiya n’ibitenge byabasaziyeho.




Amarebe yarenze icyo Agatsiko kise Urugomero rwa Rugeramigozi 2 mu murenge wa Shyogwe!

Muri SHIKAMA duhora duhangayikishijwe na politiki ya FPR yahungabanije ubuhinzi n’ubworozi mu Rwanda kandi nta na rimwe dusiba kuvuga ko ikwiye gusubirwamo kuko yizwe bunyeshyamba igamije guheza umwuka abanyarwanda ngo ba rubanda nyamwinshi b’abahutu kuko ngo bagomba gupfa bishwe n’inzara.

Kuwa gatanu ku italiki 31 Mutarama 2014, Guverineri w’Intara y’Amajyepfo Capiteni MUNYANTWARI Alphonse ari kumwe n’umuyobozi w’Akarere ka Muhanga Madamu MUTAKWASUKU Yvone bagiye gushinyagurira ngo barasura abahinzi bategetswe guhinga umuceri mu gishanga cya RUGERAMIGOZI maze abaturage bamubwira akari imurori.


Guverineri  Kapiteni Munyentwari A.
Reba uko abaturage bifashe mapfubyi
Impamvu Munyantwari A. yagiye kubasura mu gishanga cya Rugeramigozi yagira ngo abacubye abagabanyiriza uburakari bamaranye iminsi guhera mu 1994 kuko bategekwa kuza guhinga muri iki gishanga bagategekwa guhingamo gusa umuceri kandi bakabuzwa gutwara ibyo bajya kugaburira abana babo none ubu inzara ikaba igiye kubamarira urubyaro.

Shikama turakwibutsa amateka ya Rugeramigozi
Duhereye kuri Guverineri w’Intara y ‘Amajyepfo twakwibutsa ko iyi ntara ibumbiye hamwe ibyahoze ari Perefegitura eshatu arizo Gitarama, Butare na Gikongoro. Muri ya politiki yo kujijisha ya FPR no guhindura amazina y’ahantu hose cyane cyane ay’inzego z’ubutegetsi bwite bwa Leta, kugira ngo abantu batazajya bakomeza kuvuga ko FPR yabatsembeye ahitwa ibunaka n’ibunaka,

Iyo Ntara yabiciyemo uturere umunani (8) twonyine : Utwo turere ni Huye, Nyamagabe, Gisagara, Ruhango, Kamonyi, Nyanza, Nyaruguru na Muhanga. Aka Karere ka Muhanga ni nako gafite Umurenge wa Nyamabuye ari nawo uherereyemo iki gishanga cya Rugeramigozi.
Mutakwasuku 

Igishanga cyahinzwemo imyaka myinshi n’umugore wa Perezida wa repubulika y’u Rwanda KAYIBANDA Gerigori witwaga Beridiyana;  Rugeramigozi ifite hegitari mirongo inani z’ubuso bw’imirima (80 ha) kikaba kiri mu kibaya kiri munsi ya Kabgayi.

Iki gishanga gihana imbibi n’impinga ya Karama  mu Majyepfo, kigabana n’i Mbare kwa Papa (Kuko Papa Yohani Pawulo II yahasuye ku italiki 9 Nzeri 1990) ariho abandi bita mu Kinini mu burasirazuba bwacyo, mu burengerazuba bwacyo hari igishanga cya Mpanda n’umusozi wa Nyakabuye naho mu Majyaruguru y’iki gishanga cya Rugeramigozi hari udusozi twa Kabgayi, Gihuma iriho n’itongo rya Perezida KAYIBANDA Grégoire ndetse n’umujyi wa Gitarama.

Kuva ku gishanga cya Rugeramigozi kugera mu Mujyi wa Gitarama harimo kilometero zibanye nyinshi zitarenga eshatu (3) kandi ni umuhanda wa kaburimbo. Mbere y’uko FPR igera ku butegetsi mu Rwanda igishanga cya Rugeramigozi cyahingwagamo ibijumba n’imboga nk’amashu na Karoti kikaba cyari ikigega cyagaburiraga Umujyi wa Gitarama kikawuhaza abaturage bose bakanezerwa kandi ku giciro cyiza.
FPR igeze ku butegetsi, yihutiye kwambura abaturage ibishanga byabahaga ubuzima bwiza. Rugeramigozi nayo ntibayibagiwe kuko bahise bategeka abaturage kureka guhingamo ibijumba bakabahatira guteramo ingano. Iyi politiki y’igihingwa kimwe irimo guca ibintu mu Rwanda n’i Gitarama irakakamba mu bitekerezo bya rubanda.

Mu mushinga witwa AGRO ACTION ALLEMANDE wakoreraga i Gahogo muri Gitarama ukaba warategekwaga n’uwitwa RWASUBUTARE niwo wahawe inshingano zo gukora ibishoboka byose ngo bahinge ingano muri Rugeramigozi. Bahinze ibihembwe bibiri zirarumba bafata ikindi cyemezo.

Kubera ko FPR yari izi neza ko igishanga cya Rugeramigozi aribwo buzima bw’abaturage batuye Umujyi wa Gitarama, yahise itegeka Goronomu RWASUBUTARE guhindura agahingamo umuceri. Kubera ko Rwasubutare yize iby’ubuhinzi kandi akaba yari abimazemo igihe kirekire akaba n’umugabo w’imfura uvugisha ukuri unakunda abaturage, yagiye kuzana abashinwa bo gupima igishanga maze banzura ko Rugeramigozi idashobora kwera umuceri n’ingano ingoma ibihumbi.

Rwasubutare waniganye na BAZIVAMO Christophe yagiye muri Minisiteri y’Ubuhinzi n’ubworozi ku Kacyiru kubabwira ko imyanzuro y’ubushakashatsi yerekanye ko igishanga cya Rugeramigozi kidashobora kwera umuceri kubera ko gifite ibumba ryinshi kikagira n’amazi akabije kuba macye.

Icyo gihe Rwasubutare yajyaga muri MINAGRI Minisitiri w’ubuhinzi yari Dr Agnès Mathilde KALIBATA wavuye i Bugande ubu akaba ari nawe ukiriho. Rwasubutare amaze guha Minisitiri KALIBATA imyanzuro y’ubushakashatsi bwakozwe n’abashinwa, Minisitiri KALIBATA yaramusubije ngo : « Ko amafaranga ukoresha muri Rugeramigozi ari ayo muri Agro Action Allemagne y’Abadage atari ayawe ntabe n’aya bene wanyu bikurya hehe niba umuceri utahera ???!!!» Ukeka ko mbeshya azabaze Rwasubutare ubu akorera PAM muri Nigeria.
Kalibata ni uwo wambaye imyeru 
Munyantwari na Mutakwasuku baje gushinyagura
Byahise biba icyemezo cy’uko abaturage bagomba guhingamo umuceri banze bakunze. Kuwa Gatanu ku iriya taliki nababwiye hejuru nibwo abo batware bo mu Majyepfo basimbukiye muri Rugeramigozi baje gucubya uburakari n’umujinya w’abaturage. Umubyeyi umwe yabwiye Guverineri MUNYANTWARI Alphonse ati :
«Nyakubahwa Goverinari ntitwumva ukuntu mudutegeka guhinga umuceri utahera hanyuma mukanatubuza gutwara uwo guteka mu rugo ubu abana bacu bakaba bagiye kwicwa n’inzara kandi twirirwa muri uyu muceri mu gishanga ntitugire akandi karimo twikorera. Ati mudutegeka gutwara gusa ibiro bitanu mu minsi irindwi ese mubona uwo muceri wahaza abana»

Iyi mvugo y’uyu mubyeyi utuye i Gihuma ikaba iteye agahinda ndetse ikwiye kuba impamvu y’impinduramatwara mu butegetsi bwo mu Rwanda cyane cyane mu rwego rw’ubuhinzi. Iyi mvugo y’uyu mubyeyi kandi ikwiye gushyigikirwa n’abanyapolitiki bashyira mu gaciro kandi bagakunda abaturage.
Ibi mbivuze kuko abahinnzi koko bafite agahinda batazi neza igihe kazarangirira. Minisitiri Dr Agness Mathide KALIBATA washubije atyo Goronomu RWASUBUTARE niwe ukiganje muri MINAGRI kuko bene wabo babonye ko ahuza n’imigambi yabo mibisha yo kumarisha abaturage b’u Rwanda inzara.

Guverineri Munyantwari A. nyuma yo kumirwa no kwisanga mu kimwaro yahise asubiza abo Babyeyi ko agiye kubakorera ubuvugizi ariko bikaba ari imvugo yo kugira ngo abikure imbere kuko ntaho ajya kubavuganira. Ikibazo rero kikaba gikomeje kuba ingorabahizi no kuburirwa umuti kandi utari kure bitewe n’uko abakagicyemuye aribo bagitera.

Shikama turasaba kuvugurura politiki y’ubuhinzi
Nk’uko nabivuze kandi tutahwemye kubivuga muri SHIKAMA, birababaje kandi biteye n’agahinda kubona Leta ifata icyemezo cyagambiriwe kandi cyigayitse cyo kwicisha abaturage bayo inzara. Turasaba Leta y’u Rwanda rwose kudohora igaha abaturage uburenganzira bwo guhinga ibyo bashaka ku butaka bwabo kuko urusha nyina w’umwana imbabazi aba ashaka kumurya.

SHIKAMA twifatanije n’abaturage batuye i Gitarama mu Mujyi, Gihuma, Shyogwe, i Mbare kwa Papa mu Kinini, i Mpanda, Nyakabuye n’abandi bose bagizweho ingaruka mbi na politiki ya FPR yo gusenya no gupfusha ubusa ibishanga byabahahiraga bikanabaha kubaho neza birimo na Rugeramigozi twibanzeho muri iyi nkuru none ubu bakaba bifuza gupfa bakabibura aka wa mugani wa Perezida Daniel Arap Moi wa Kenya wazimenye mbere y’uko zigera mu Rwanda. Nimukomere! 

BAZIGUKETA F.
Shikama Ye

PS / Nkusi Yozefu
Urakoze muvandimwe Baziguketa. Ariko umbabarire ntibikurakaze ! Mu kinyarwanda baravuga ngo so ntakwanga akwita nabi ! Ndifuza ko umunsi umwe uzatubwira impamvu so yakwise Baziguketa! Ubundi uko mbizi Baziguketa ni umwe mu Bahowe  Imana mu Bwami bwa Buganda ho muri Uganda ya Museveni. Ni umutagatifu nka ba Kizito na Lwanga. Baziguketa mu rurimi rw’ikiganda ndakeka ko bivuga ko bazi Gukata imitwe = bazi kwica. Burya kandi ngo n’umugani ugana akariho, aba bantu bavuye i Buganda umugambi wabo ni ukuduketa bakifatira amakashi bagasubira iyo bavuye. Ariko bajye tujye, no mu mbere tuzabasangayo!

Batangiye bicisha udufuni, akandoyi, amarozi(utuzi twa Nziza na Munyuza), gutwika umuntu abona, ubu bageze ku biziriko n’inzara. Ariko Mana turazira iki twebwe abanyarwanda koko? Iki kibazo muby’ukuri ntabwo kiri muri kiriya gishanga kivuzwe hejuru gusa kuko ari mu Rwanda hose. Kuva muri 2007 kugeza muri 2009, nari ntuye ku i Taba hasi mu mazu ya Kaminuza ya Butare. Ni muri m600 uvuye ku gishanga cya Rwabuye cyagaburiraga ibyahoze ari komini Huye, Ngoma , Mbazi, Rusatira, yewe na Runyinya. Nkuko byagenze kuri kiriya cyo hejuru, abaturage barabanje bategekwa guhinga umuceri, wanze babategeka guhinga ibigori bababuza kubisarura, imvura iguye yasanze biri ku mbuga ngo y’utuzu bari barageneye kubihunikamo mbere yo kubigemura i Kigali. Nyuma, abaturage babwiwe ko uwari kubigura atabonetse. Bashwawe babwira buri muturage gutwara ibiro 4(bine)!. Ahanini kandi muri icyo gishanga, twababwira ko abasirikare bakuru ba RDF n’abategetsi ba FPR banyuranye bateyemo imbingo z’inka zabo.

Navuye i Butare muri Kanama 2009, ikijumba cyari gitunze Butare kirya umugabo kigasiba undi. Iki gishanga nabibutsa ko ari nacyo cyatungaga amashuri yose ya Butare ushyizemo na Kaminuza. Ibintu bimaze kuzamba rero, ayo mashuri yose na Kaminuza barya ibiribwa biva ku Gikongoro.
Ngayo nguko, ya humiriza nkuyoboye niwanga ngukindure twazaniwe n’ubutegetsi bw’abgatsiko ka Kagame. Nashake aho yaboheshejje ikiziriko yicishije Koloneli Karegeya Patrick bamubohere byinshi kuko ibi bintu ntidushobora gukomeza kubyihanganira.

Nkusi Yozefu

Shikama ye. 

No comments:

Post a Comment

Muvandimwe, nshuti ya SHIKAMA, turagushimira cyane umuganda utanga wo kubaka URWANDA rushya ubinyujije mu bitekerezo byawe( Komanteri). Kugirango turwanye urukungu rw'Agatsiko ni ngombwa ko buri komanteri ibanza gusuzumwa. Yohereze, irahita ijya ku rubuga mu minota mike niba idatandukira( kuvuga ibitajyanye n'inyandiko), itukana, cyangwa yuzuyemo uburere buke.

Wipfusha komanteri yawe ubusa ukoresha "ANONYMOUS", himba izina urikomeze kuko hari ibihembo mu Kuboza 2016 ku bantu 3 bazaba babaye indashyikirwa mu gutanga ibitekerezo. Dukomeje kubashimira ubwitange n'umurava muhorana. IMANA Y'I RWANDA ihorane namwe iminsi yose.

Dg NKUSI Yozefu
www.shikamaye.blogspot.com
Uharanire ko Ukuri gusimbura ikinyoma.
Email: mahoriwacu@gmail.com; tel: +4745564355