Pageviews all the time

Dushimire bamwe mu bakuru b'ingabo za APR batishoye mu bwicanyi bw'akandoyi n'agafuni bwakorewe Abahutu, bikabaviramo kubizira intambara irangiye mu kwezi kwa Nyakanga 1994 nyuma ya raporo ishinja abo basirikare bakuru, Kapiteni J. Nziza yashyikirije Jenerali Majoro Kagame./ Bakizimbwa Paul Kizito


General MUHIRE wagiye abwirizwa kwica 
abahutu akabyanga akaba abizize

Shikama ntijya isiba kugeza ku bakunzi n'abasomyi bayo ubwicanyi ingabo zahoze ari iza APR ziyobowe na Kagame zakoreye abahutu hamwe n'abatutsi batabashije kugaragaza indangamuntu zerekana ko ari abatutsi koko.



 Ubwo bwicanyi bwakozwe ahanini hifashishijwe intwaro gakondo zirangajwe imbere n'agafuni hamwe n'akandoyi (uburyo ingabo zahoze ari iza APR zakoreshaga zica abahutu zibazirikira amaboko inyuma agatuza kagafora), ntabwo amabwiriza yatanzwe na Kagame yo kwica izo nzirakarengane yubahirijwe n'abakuru b'ingabo bose.


Dukurikije amakuru yagiye ava muri  bagenzi bacu babarizwaga mu yandi mabatayo, n'andi makuru ubwacu dufitiye gihamya, nk'umwe mu bagize Shikama izwiho guharanira Ukuri na Demukarasi, twifuje kuba twashimira bamwe mu basirikare bakuru bayoboye ingabo za APR ariko amaraso y'agafuni akaba atabajejeta mu biganza.



Muri Shikama kandi twifatanyije n'abo bakuru b'ingabo baje kwamburwa icyubahiro cyabo intambara irangiye nyuma y'uko iperereza rya Kagame risanze batarubahirije itegeko n'amabwiriza yo kwica abahutu bari mu gice cyayoborwaga n'izo ngabo z'inyangamugayo.


Mbere y'uko tubagezaho ibigwi by'umusirikare mukuru Jenerali Majoro Sam Kaka(Kanyemera), muri Shikama twahisemo ko yahagararira abandi mu gushimirwa, turagirango tunyuremo mu ncamake, zimwe mu mpamvu zaba zaratumye aba basirikare bahitamo kuba inyangamugayo aho gukurikiza itegeko rya  Afande mukuru Kagame ryo kwica abahutu.


Twifashishije ingero z'abari bayoboye mobile group(ni nka brigade y'ubu) igihe cy'intambara ya APR cyane cyane igihe cya Jenoside, uhita ubona impamvu bamwe bifashe ntibakurikize amabwiriza avuye i bukuru kwa Kagame ngo bategeke ingabo bayoboye gukubita abahutu agafuni(bitavuze ko bamwe mu basirikare bari bayoboye batishe abahutu).


LtCol Fred Ibingira. Umusore muto(icyo gihe) wayoboye 157 mobile group iturutse mu Mutara, Kayonza, Kibungo, Bugesera, Gitarama, Butare.


Nk'uko n'izina rye ribigaragaza, Ibingira yakuriye mu muco w'Abagande yibera Umugande afata n'izina ry'Abagande"Ibingira". Niba afande we Kagame yaramubwiye ati ntubabarire ibihutu nibyo byatumye tujyanwa i Shyanga, uyu musore ntiyari kubyanga kuko Abanyarwanda atari anabazi cyane.


 Lt Col Jackson Rwahama, wayoboye Military Police akaba azwiho kuba yarakubise agafuni abahutu benshi muri Kigali n'ahandi. Nka Ibingira, Rwahama nawe yibereye Umugande burundu ubwo yabaga mu ngabo zaho. Amakuru dukura ku bamuzi neza bemeza ko Rwahama yinjiye igisirikare cya Uganda kera akaba yari na Officier mu myaka ya za 1970.

Ikindi cyatumye Rwahama ashyira itegeko rya Kagame mu bikorwa ryo kwica abahutu, n'uko n'ubusanzwe uyu musirikare njye nibuka ko yari akuze umurebye no kumaso, yaranzwe n'ibikorwa by'ubujura cyane ku buryo ngo kuza ku rugamba rw'inkotanyi yasaga nk'uhunze imiryango y'Abagande n'Abanyarwanda yibiye inka.

Akandi gashya kazwi kuri uyu musaza Rwahama, n'uko yigeze kuminjira amasasu menshi kuri imwe mu nzu nziza mu Kiyovu cy'Abakire, bamubaza bati Afande uri mu biki, indani haba hihishemo haduyi? Ati wapi sha naringize ngo iyi ni ibanka(banki). 

Iyo ufashe ibikorwa bya Rwahama ukabigereranya na 101 mobile group yayoborwaga na Koloneli Muhire(Umunyarwanda wuzuye) yarwaniraga mu bice bya Gitarama, uhita ubona impamvu bamwe mu bayobozi b'ingabo bijanditse mu bwicanyi kuko amakuru dufitiye gihamya ni uko Muhire atishe Abahutu ndetse na bamwe mu basirikare babikoze yarabahannye bimuviramo urwango rwatumye aburabuzwa kugeza ajo bundi yirukanwe mu ngabo z'Igihugu.

Si Koloneli Muhire gusa witwaye neza kuko na Koloneli Bagire W. waciye mu bice bya Mutara, Rwamagana, Kabuga agahingukira i Kigali na 7th mobile group yarayoboye, bivugwa ko nta bwicanyi  yakoze.

Abandi nabo Shikama yababwira ni nka Col Gashumba na Col Ngoga bayoboraga Charlie na 59th Mobile group ariko nyuma yaho Kagame ahawe amakuru na Lt Col J.Kabarebe wayoboraga Unit ya High Command nawe ayagejejweho na Majoro Gumisiriza wari IO(intelligence Officer), na Liyetona J. Nziza wari umwe mu bayobozi b'umutwe DMI, ko batigeze bica abahutu, byabaviriyemo kwirukanwa mu gisirikare no kwicwa(Col Ngoga).

Nyuma yabo bose Shikama imaze kubarondorera,  twaherukiriza kuri Jenerali Majoro Sam Kaka(Kanyemera Samweli), umusirikare twatangiye tubabwira ko ariwe twahisemo guhagararira izi ngabo z'inyangamugayo.

Jenerali Majoro Kanyemera Samuel cyangwa Sam Kaka nk'uko akunze kwitwa
Kagame ari Majoro mbere y'uko ahita agirwa Jenerali Majoro igitaraganya igihe amasezerano y'Arusha yari atangiye, Sam Kaka nawe yari Majoro banganyaga ipeti.
Majoro Sam Kaka yari akunzwe n'abasirikare cyane kandi akaba n'umusore wubahwa utinyitse ariko ufite igikundiro kidasanzwe.
Brigadier General Kanyemera Samuel aka SAM KAKA
Ubwo nageraga mu Nkotanyi nk'uko Shikama yigeze kubibagezaho, umusirikare nakunze kurusha abandi ni Majoro Sam Kaka ubwo yari kumwe na Kagame Paul badusezeraho tugiye i Kigali muri wa mutwe Shikama yigeze kubagezaho ko woherejwe muri Kigali kwivanga n'abaturage ngo ubaneke.

Afande Sam Kaka nongeye kugira amahirwe yo kumubona no kubona ibikorwa bye bitarimo ubwicanyi ubwo Alpha Mobile Group yayoboraga yahise ihamagazwa kuza Kigali ivuye i Byumba muri Komine Miyove, igihe urugamba rwari rukaze Habyarimana amaze kwicwa.

Imwe muri Coy ya Alpha, C Coy(si koyi cg si kompanyi) yari iyobowe na Liyetona Murabyo yaje gutinda kuko yagombaga guhingukira za Kinyinya igakomeza igana kuri jandarumori ya Kacyiru iciye ku bitaro by'Umwami Fayisari, ariko igihe cyari giteganyijwe ko iyo coy ihagerera cyageze itaraza.


Shikama irababwira ko uko gutinda kw'iyo Coy kuko yagombaga kuba nibura Saa Cyenda z'ijoro igeze hafi y'ibitaro bya Fayisari, byatumye hafi ikibazo gikomeye kuko iyo coy niyo yagombaga kurasa ku bajandarume ba Kacyiru mu buryo bwo kubarangaza ngo Majoro Kigofero wari wubatse umuyoboro ku Gisozi wo kubohora Abatutsi bari bihishe muri Saint Michel abone uko arangiza icyo gikorwa adakomwe mu nkokora n'abajandarume bari Kacyiru.

Amakuru ku byombo yakomeje gucicikana hibazwa uko byagendekeye C Coy bituma hashakishwa abantu bazi biriya bice neza kugirango babashe kuyiyobora. Shikama irakomeza ibamenyesha mu batoranyijwe, na Bakizimbwa Paul Kizito umwanditsi Mukuru wungirije wa Shikama, yari arimo. 

Icyaje gutangaza ni uko intumwa zoherejwe gushakisha C Coy, zaguye kuri abo basirikare bagera ku ijana n'imisago (kuko Coy cyari igice kigize Mobile group igizwe hafi n'abasirikare 2000, hanyuma iyo mobile ikagabanywamo coy ziri hagati ya 8 na 12 bitewe n'uko ingana) basinze babaye imirambo nyuma yo kugwa ku idepo(ububiko) y'inzoga baranywa barasinda ubwenge burayoba.

Uko gusinda C Coy ntitabarire igihe byatumye Majoro Kigofero apfusha umusirikare wo mu rwego rwa S/Lt hamwe n'abandi batatu igihe bari  mu gikorwa cyo kwambutsa Abatutsi babohoye muri Saint Michel. Kuko igihe cyari giteganyijwe ko C Coy irasa kuri Jandarumori yari saa cyenda n'igice z'urukerera, hanyuma yo iza kuhagera mu ma saa yine za mugitondo

Liyetona Murabyo nawe wayoboye C Coy yabarizwagamo abasirikare basinze, yaje guhita afungwa intambara irangiye. Amakuru muri Shikama dufite ni uko afande Murabyo yaje gufungurwa yoherezwa mu bice bya Ruhengeri igihe cy'intambara y'abacengezi mu mwaka w'i 1998 apfira i Gankenke muri Ruhengeri arashwe n'abacengezi.

Nk'umwanditsi w'iyi nkuru kuri Shikama, igihe namaranye na Alpha Mobile group yayoborwaga na Sam Kaka, ntaho nigeze mbona abasivile bicwa, ndetse nta nubwo twigeze duhabwa amabwiriza yo kwica abahutu nk'uko byagiye bigendekera bagenzi bacu babarizwaga mu zindi Units, cyane cyane muri Mobile group ya Lt Col Fred Ibingira.

Kuba Afande Samuel Kanyemera atarakurikije amabwiririza ya Kagame yo kwica abahutu byamuviriyemo ibyago bikomeye intambara imaze kurangira.
Amakuru Shikama ikura muri zimwe mu ngabo zahoze ari iza APR yaje guhinduka RDF, aratangaza ko intambara y'inkotanyi irangiye muri Nyakanga 1994, Afande Sam Kaka yahise agirwa Chef d'Etat Major ariko nyuma y'uko iperereza rya Kagame ritahuye ko Sam Kaka atagiye yica abahutu aho yagiye arwanira, Kagame yahise amusimbuza Colonel Kayumba F. Nyamwasa kuri uwo mwanya wa Chef d'Etat Major.

Kuva icyo gihe, Shikama irakomeza ibamenyesha ko Sam Kaka yakomeje kwangwa n'abandi bayobozi b'ingabo(babicanyi) kuburyo butavugwa.

Urwo rwango rwaje kuviramo Sam Kaka kumanurwa mu ntera ku buryo bugaragarira buri wese ubwo yaje no koherezwa mu Nteko ishinga amategeko y'Abadepite naho ntaze gutindamo kubera kutavuga rumwe na Afande J. Nziza wari umaze kugirwa ikigirwamana na Kagame.

Inkomoko y'urwango rukabije Jenerali J.Nziza yanga Jenerali Sam Kaka
Amakuru agera muri Shikama atanzwe n'abantu bazi neza impamvu Jenerali Nziza atahwemye guteranya Jenerali Sam Kaka kwa Jenerali Kagame, aratangaza ko urwo rwango atari urw'ubu gusa ahubwo rwatangiye intambara ya APR ikirangira ubwo Kapiteni (icyo gihe) J.Nziza yakoraga iperereza ku basirikare bitwaye neza(bica abahutu) ngo bagororerwe imyanya ikomeye.

Iryo Perereza rya Kapiteni Nziza ryaje kurangira ahaye Kagame raporo irimo amazina y'ibikomerezwa nka Koloneli Sam Kaka, Lt Koloneli Fred Nyamurangwa na Lt Koloneli Kazintwari Kadhafi.

Abo bose Kapiteni J.Nziza yatanze muri raporo ye kwa Jenerali Majoro Kagame, bahise babihanirwa byihuse.
Shikama irababwira ko usibye Col Sam Kaka wahise yamburwa umwanya w'ikirenga wa Chef d'Eat Major, Lt Col Nyamurangwa we yahise afungwa akurwaho n'amapeti ya gisirikare azira cyane ko igihe yarwaniraga ku musozi wa Rebero, aho kwica abahutu we yabavanze n'abatutsi barokotse ntihagira n'umwe upfa.

Lt Col Kazintwari Kadhafi, icyo Shikama yabashije kumenya ko yaba yarazize, harimo kuba atarabashije kwica abahutu ku rwego rwo hejuru nk'urwo mugenzi we Lt Col Ibingira yari agezeho. 

Muri raporo Kapiteni Jack Nziza yashyikirije Major Gen Kagame, yagaragaje ko Lt Col K. Kadafi igihe yari ayoboye batayo ya 101 yigeze kuyoborwa na Col Muhire, abasirikare b'iyo Batayo bari bafite ikinyabupfura  kidasanzwe batojwe na Col Muhire bituma Lt Col Kadhafi ananirwa kubinjizamo gahunda yo kwica abahutu.

Uko kunanirwa gushora abasirikare mu bwicanyi, byatumye Kadhafi avanwa mu bice bya Gikongoro na Cyangungu, Kagame ahita yoherezayo Lt Col Fred Ibingira ngo ajye guhorahoza abahutu bari bamucitse. Ibingira ntiyazuyaje  kuko mu mwaka wa 1995, yahise yica abahutu barenze ibihumbi umunani(80,000) mu nkambi ya Kibeho mu gihe kitarenze amasaha 48. Icyo gihe yahise agororerwa ikiruhuko cyo gukora ubukwe.

Kuva icyo gihe, Shikama irabamenyesha ko Lt Col Kadhafi yahise atangira inzira y'umusaraba yirukanwa mu gisirikare.Ubuzima bwa gisivile bumukomeranye, yinjiye mu mupira w'amaguru afata ikipe ya Kiyovu Siporo arayiyobora biranamuhira kuko i Nyamirambo, Biryogo aho iyo kipe ibarizwa higanje abaturage b'idini ya Kisiramu kandi Kazintwari Kadhafi niryo dini abarizwamo.

Shikama idahwema kubagezaho amakuru y'ibyahishuwe, irabamenyesha ko Jack Nziza wari umaze kugabirwa ipeti rya Majoro yahise abwira Kagame ko ntacyo bakoze kuko kwirukana Kadhafi mu gisirikare ntacyo byamuhungabanyijeho ubu aryoshye mu buzima bwa  gisivile kubera ikipe ya Kiyovu Siporo.

Nta kuzuyaza, Kagame na Nziza bahise bateza akavuyo mu ikipe ya Kiyovu Siporo babicishije kuri Bernard Makuza, maze Kadhafi akurwa ku mwanya w'ubuyobzi bwa  Kiyovu yinjira inzira y'ubukene atyo.

Shikama iramenyesha abasomyi n'abakunzi bayo ko abo basirikare Lt Col Kazintwari K. na Lt Col F. Nyamurangwa bahoze ari abayobozi bakuru cyane mu buyobozi bw'ingabo za Kagame, ubu bibereye abaturage basanzwe aho Kadhafi umushaka wamusanga aho abasore b'abisiramu b'i Nyamirambo baba bateraniye(ku irigara) biganirira umupira w'amaguru naho Nyamurangwa ukaba wamusanga mu Rusengero rw'Abarokore.

Jenerali Sam Kaka nawe habuze gato ngo abe ari umuturage usanzwe
Andi makuru Shikama yabashije kubonera abasomyi n'abakunzi bayo arebana n'impamvu Jenerali Nziza yashakaga gucisha umutwe Jenerali Sam Kaka kwa Kagame, n'uko Kagame amaze kumanura mu ntera Sam Kaka, yaje kumupfa agasoni amuha kuyobora amasoko ya Gisirikare, ibiro bye biri mu kigo cya Kanombe.

Uko guhabwa kuyobora amasoko(ahantu harimo ifaranga) ntibyashimishije Jack Nziza wari umaze guhabwa ipeti rya Majoro bitunguranye, kandi akaba nawe muri Camp Kanombe yari ahafite ibiro kuko yayoboraga DMI kandi iyo DMI ikaba yarajagataga ahantu hose. 

Icyo gihe Majoro Nziza yari amaze guhabwa na Kagame ububasha bwose mu gisirikare no mu gisivile ku buryo yari akomeye kuruta abasirikare babarizwaga mu rwego rwa Jenerali kandi we akiri Majoro.
Shikama irabamenyesha ko majoro Nziza yakomeje guteranya Afande Sam Kaka ashakisha abasirikare bamuhimbira ko anyereza amafaranga yo mu masoko(tender) atangwa ku bikoresho bikenerwa mu gisirikare.

Uko guteranya Sam Kaka byaje kuviramo uwo mujenerali  kubura uburyo atangira kugarizwa n'ubukene ndetse n'agasuzuguro kenshi ubwo, nk'urugero: ku kiriyo cy'umucuruzi  Uziel, J. Nziza yohereje DMI n'abapolisi guta muri yombi umucuruzi Rwigara, hanyuma Jenerali Sam Kaka na Jenerali Rusagara babuza izo ntumwa za Nziza gukora amahano ku kiriyo.

Shikama irabamenyesha ko nyuma y'uko Jack Nziza atanze amakuru kwa Kagame y'uko byagendekeye abahungu be ku kiriyo yongeramo n'ibihimbano nko kuvuga ngo Sam Kaka yise Kapiteni w'umupolisi ngo ni Kadogo, Kagame yahise atukira abo bajenerali ku mugaragaro abinyujije mu itangazamakuru.

Ako kaga kose kagwiriye aba basirikare bahoze ari bakuru mu ngabo za APR, Shikama irabamenyesha ko intandaro yako ari uko batakunze kwijandika cyane mu bwicanyi bwakozwe n'ingabo za APR zibukorera abaturage bo mu bwoko bw'abahutu.

Jenerali utazi gusoma no kwandika, Kagame yagororeye iri peti ndetse akanamushimira
 birenze amukorera ubukwe bw'akataraboneka amaze gutsemba impunzi z'abahutu i KIBEHO
Kubera iyo mpamvu y'ubunyangamugayo bwabaranze igihe cy'urugamba, Shikama ihisemo gushimira abo basirikare kandi inakangurira abandi bose bagize uruhare muri ubwo bwicanyi, gusaba imbabazi abo babukoreye byaba ngombwa bagashyikirizwa ubutabera.
General Paul Kagame ati:" ntacyo bimbwiye muvuze ko ndi umwicanyi. "
Hari igihe bizakikubwira urabeshya.

Jenerali J. Nziza. Umugande w'umufumbira wari wararahiye ko azasubira iwabo nta muhutu ukibarizwa mu Rwanda, ubu noneho n'abatutsi abageze ibuce

Bakizimbwa Paul Kizito
Umwanditsi Mukuru wungirije kuri Shikama
Shikama ku Kuri na Demukarasi(SKUD).
______________________________________________________________________________
PS/ NKUSI YOZEFU
Arakoze umuvandimwe wacu Bakizimbwa kuri iyi nkuru icukumburanye ubuhanga nk'izindi adahwema kutugezaho. Hari utuntu duke namwunganiraho:

Ku byerekeye Sam KAKA
1.Ibi bya Sam Kaka,  Kagame amutamaza ku mugaragaro nari mu Rwanda hakaba hari muri 2009, inkuru ica igikuba mu bategetsi bakomeye b'Agatsiko. Hari inama nari ndimo ahantu, umwe mu bategetsi aza kutuganirira kuri iki kibazo, uwayoboraga inama ariyamira, ati :"turashize, ibi turiho tujyaho impaka murebe neza bitaba ari umutego natwe wo kuduhitana"!
2. Ikindi nababwira Bakizimbwa atavuze ni uko Jeneral Sam Kaka  yahise afatwa akiri muri kiriya kiriyo maze arafungwa na bagenzi be bandi babujije Jack Nziza gukora amahano mu kiriyo. Nyuma habaye urubanza aza kugirwa umwere.Kanda aha niba wumva icyongereze wumve uko yagizwe umwere.
3. Icyo narangirizaho ni uko uyu SAM Kaka ari ku rutonde rw'abasoda 40 ba FPR bashakishwa na INTERPOL( polisi Mpuzamahanga ) kubera impapuro zo kubafata zatanzwe n'ubutabera bw'igihugu cya ESPAGNE; Sam KAKA akaba ari nimero ya 20.


LISTE DES 40 MILITAIRES DU FPR OBJET DES MANDATS ESPAGNOLS
 1. JAMES KABAREBE, General Major.
2. KAYUMBA NYAMWASA, General Major
3. KARENZI KARAKE, 
Brigadier general
4. FRED IBINGIRA, General Major
5. RWAHAMA JACKSON MUTABAZI, Colonel
6. JACK NZIZA (o JACKSON NKURUNZIZA o JAQUES NZIZA),
Brigadier general
7. RUGUMYA GACINYA, Lt Colonel
8. 
DAN MUNYUZA, Colonel
9. CHARLES KAYONGA, Lt General
10. JOSEPH NZABAMWITA, Lt Colonel
11. CEASER KAYIZARI, General Major
12. ERIK MUROKORE, Colonel
13. DENYS KARERA, Major
14. EVARISTE KABALISA, Captain
15. JUSTUS MAJYAMBERE, Major
16. EVARISTE KARENZI,Sgt
17. ALEX KAGAME, General de Brigade
18. CHARLES MUSITU, Colonel
19. GASANA RURAYI, Lt Colonel
20. SAMUEL KANYEMERA known as SAM KAKA,
 Brigadier general
21. TWAHIRWA DODO, Colonel
22. FIRMIN BAYINGANA, Lt Coronel
23. AGUSTÍN GASHAYIJA, 
Brigadier general
24. WILSON GUMISIRIZA, 
Brigadier general
25. WILLY BAGABE, Coronel
26. WILSON GABONZIZA, Lt
27. 
SAMUEL KARENZEZI, alias “Viki”, Caporal
28. JOAQUIM HABIMANA, Captain
29. KARARA MISINGO, Captain
30. ALPHONSE KAJE, Captain
31. FRANK BAKUNZI, Captain
32. DAN GAPFIZI, 
Brigadier general 
33. JOHN BUTERA, Lt
34. CHARLES KARAMBA, Colonel
35. MATAYO, Captain
36. PETER KALIMBA, Colonel
37. SILAS UDAHEMUKA, Major
38. STEVEN BALINDA, Major
39. 
JOHN BAGABO, Colonel
40. GODEFROID NTUKAYAJEMO, alias “Kiyago”, Captain

No comments:

Post a Comment

Muvandimwe, nshuti ya SHIKAMA, turagushimira cyane umuganda utanga wo kubaka URWANDA rushya ubinyujije mu bitekerezo byawe( Komanteri). Kugirango turwanye urukungu rw'Agatsiko ni ngombwa ko buri komanteri ibanza gusuzumwa. Yohereze, irahita ijya ku rubuga mu minota mike niba idatandukira( kuvuga ibitajyanye n'inyandiko), itukana, cyangwa yuzuyemo uburere buke.

Wipfusha komanteri yawe ubusa ukoresha "ANONYMOUS", himba izina urikomeze kuko hari ibihembo mu Kuboza 2016 ku bantu 3 bazaba babaye indashyikirwa mu gutanga ibitekerezo. Dukomeje kubashimira ubwitange n'umurava muhorana. IMANA Y'I RWANDA ihorane namwe iminsi yose.

Dg NKUSI Yozefu
www.shikamaye.blogspot.com
Uharanire ko Ukuri gusimbura ikinyoma.
Email: mahoriwacu@gmail.com; tel: +4745564355