Pageviews all the time

“Ingoma iraducitse" amagambo yavuye mu munwa wa Kagame ubwe. Mbangurunuka mbaye nisabiye imbabazi hakiri kare. Soma!/ Paul MBANGURUNUKA


Nkuko Shikama yabibagejeje ho ejo tariki ya 6/8/2015, Paul Mbangurunuka ni umunyarwanda ukurikira ibibera mu Rwanda no mu karere ruherereye mo guhera ku ngoma ya Bwengenyakuri Kayibanda kugeza ku ya Rukarabankaba Kagame. Uyu mugabo yagiye aburira abantu kenshi ku mahano abugarije, byose bikaba byarabaye. Kubirondora bwakwira bugacya; icyo twabibutsa cya hafi ni intambara y'i Burundi yatangaje ko yariho itegurirwa mu Rwanda umwaka ushize wa 2014, akavuga abari bayirimo n'izina rya Hoteli inama yaberaga mo, iyi nyandiko twayihitishije kenshi mu "nyandiko zo mu bubiko" Icyo gihe i Burundi hari amahoro bituma abantu benshi bafata ibyo Mbangurunuka yavugaga nk'amahomvu, nyamara amaso nabahe, ibiriho biba ubu byose murabisanga muri iyo nyandiko twavuze hejuru. Bityo, twe muri Shikama, tubona iby'uyu mugabo avuga nta muntu wabifata runono, abakora gutyo, bazabyumva bashaje!

Ubwanditsi bwa SHIKAMA

______________________________________________________________________________

Muraho  mwese basangirangendo. Abenshi mwibaza ko napfuye cyangwa se nkaba mfunze ariko ibi byose nta na kimwe kigeze kimbaho..ndi mutaraga.
Reka ngaruke ku mutwe w’iyi nyandiko aho ngira nti : Ingoma iraducitse. Ku giti cyanjye ndasaba imbabazi z’ibibi byose twakoreye u Rwanda, Abanyarwanda muri  rusange ntibagiwe n’abanyamahanga.  Ubwo duherukana niba ntibeshye hashize umwaka, nasize hanuka uruntu runtu ariko mubicira inyeri, none ubu byamaze kuba urukonda.

Hari amakuru menshi cyaneeee, ngomba kubageza ho ariko namwe ntimuyobewe uburyo bigoranye kugirango nyabageze ho ariko nzagerageza tu. Mubyo murarikiwe harimo umukino uhanitse urikuba mu ifungwa rya Afande Karake, urwikekwe n’ubwoba birenze ukwemera Kagame afitiye Afande Kabarebe n’impamvu yabyo, Inyigisho zimvo n’imvano y’amakimbirane hagati y’abahutu n’abatutsi nk’uko byamaze gutegurwa na Tito Rutaremara bikaba bigomba kwigishwa intore zose hamwe n’urubyiruko, Ikosa ryakozwe kugirango kudeta i Burundi ipfube kandi twari tumaze umwaka tuyitegura hamwe n’ihagarikwa ryo guhungabanya Tanzania hifashishijwe ingufu za gisirikare ahubwo tugakoresha inzira ya politiki.

Ni byinshi cyane abarwaye amaso nimwihutire kuyivuza cyangwa mugure amataratara amaso muyahange mudasobwa n’amatelefoni yanyu. Okay, reka nkomereze ku ngingo nyamukuru, Kagame ubwe yadutangarije mu mukutano ko ingoma iducitse kandi aritwe ubwacu(abakuru b’ingabo, maneko) tubiteye. Mwibuke ko muri iyo nama ababa barimo ari abatutsi gusa b’abasirikare hamwe n’abasivile b’abakada.

Inama yabaye mu mpera z’ukwezi kwa Nyakanga iyobowe na Kagame ubwe ikaba yaragaragayemo udushya twinshi nk’aho Kagame yadukiriye afande Nziza akamwandagaza amushinja ko ibi byose biri kuba abifitemo uruhare runini akaba ataratinye no kumushinja ko ananiwe. Ntiyibutse no kumuha icyubahiro cy’uko abasore be (bamwe baniga banatanga utuzi )bari aho. Ikindi cyatunguranye ni ukubona afande Nziza yaraje kwicarana natwe kandi ubusanzwe yicarana na Kagame nk’umuntu ushinzwe guhuza inzego zose za gisirikare n’iza gisivile. Inama itangira, Kagame yatangiranye uburakari budasanzwe atumenyesha ko guhera uwo munsi tugomba guhita twitegura kurwana intambara ikaze kandi itandukanye kure n’izo twarwanye zose.

Yahise atubwira adaciye kuruhande ko uko ibintu bimeze dusa nk’abamaze gutsindwa mu nzego zose haba igisirikare, politiki na dipolomasi. Asa n’useka ariko bimwe bye byo guseka ababaye, yatubajije uburyo twumva ko twaba tutaratsinzwe mu gihe umuhutu amahanga yakuyeho amaboko hari n’imvururu mu gihugu cye abasirikare bavanze n’abasivile bari kumwamagana ariko akaba akomeje kutuyoborana.

Yadutangarije ko ubu imbaraga zose kugirango dutsinde uru rugamba tugiye gutangira tugomba kuzishakamo kuko ubu abadufashaga basa n'ako bamaze kudukuraho amaboko. Atangira kudutuka ko ari twe twabiteye kuko badushinja guhugira muri tekinike zacu(kwica abaturwanya) tukiyibigiza akazi tugomba kubakorera. Aha yashakaga kuvuga ko inzego zacu z’ubutasi zagize uburangare cyane bigatuma Afurika y’epfo na Tanzania batwirukana muri Congo(intambara ya M23). Ibyo byarakaje cyane Amerika n’Ubwongereza ku buryo bahise bashakisha undi wabakorera.

Kuri iyi ngingo, Kagame yahise aduhishurira ko nawe ubwe byamubabaje cyane ahita anatubwira ko ariyo mpamvu Jenero Kayonga yahagaritswe akajyanwa mu mirimo ya gisivile(Ambasaderi) kuko nyine igisirikare cyari cyamunaniye. Akomeza agira ati, niba abo bari bazanye indege zabo z’intambara, ni kuki hatabayeho ugushishoza ngo duhagurutse za missiles zacu nibiba ngombwa dutumize n’izirenze? Zari gutwara iminsi ingahe mu nzira? Ari wowe, umujenerali nk’uwo wamukorera iki? Umuntu unanirwa intambara nk’iriya ntacyo abuze?

Si we kandi gusa, nawe Jenero Nziza, ntaho mutaniye. Wansobanurira ute ukuntu wabyina intsinzi y’uko kanoli Karegeya apfuye, kandi usize utuzi twese aha ndetse naho twicaye, ukamusiga agihumeka ntacyo ubuze ngo ingorane ari guteza zirangire? Aha yashaga kuvuga Afande Nyamwasa.

Akomeza abwira Nziza: twatakaje imbaraga zingana iki kugirango duhagarike umwanzi uri hanze utumereye nabi ntatinya no kuvuga ko yamaze kutunesha? Amafaranga twatakaje angana iki, ububanyi n’amahanga bwacu bwo ntibwahindutse zero kandi ukaba utabasha kunyereka nibura mayiti n’imwe y’abo badutesheje umutwe.

Wansobanurira ute ukuntu byitwa ko iyo za Mozambike, Malawi, South Africa n’ahandi hitwa ko hari defense yacu(ibirindiro by’abicanyi) warangiza ukumva ngo kanaka yahavuye yakoresheje amanama n’impunzi zaho utashoboye kumuhagarika(kumwica). Aha yashakaga kuvuga Padiri Thomas.

Nziza yabaye nk’ushaka kwiregura ariko Kagame amwima umwanya n’ubwo nyuma afande Nziza yaje guhabwa ijambo akavuga ko icyatumye gahunda(zo kwica) zicumbagira ari uko bamwe mu baziyobora barimo nka Gakwerere, ubu bakurikiranwa cyane kubera ko amazina yabo yagiye agaragara muri attempts zimwe na zimwe, bigatuma habaho ikintu gisa nko kwigengesera.

Kagame yadutangarije ko kumva ko dushyigikiwe n’Amerika bidahagije kuko bashobora no kwifashisha undi mu gihe twe tunaniwe. Adutangariza ko afite amakuru yizewe yahawe n’inshuti ze(bishoboka ko ari Tony Blair na Clinton ) ko umwe mu banyapolitiki baturwanya yagerageje gucengera, kwinjirira Amerika abumvisha ko we ikibazo cya FDLR yakirangiza byihuse, ko bamwemereye bagakorana na Kabuga yamubaha. Nta gushidikanya ashobora kuba yaravugaga Twagiramungu. Kagame ati iyo hatabaho gukomakoma ubu indege zabo ntiziba zuzuye ikirere cyacu ziturasaho..ati usibye ko n’ubundi bisa nk’aho bitoroshye iyo basigaye batinyuka gufunga abantu bacu(Afande KK).
Inama yenda kurangira, Afande Nyamvumba yagaragarije Kagame aho umushinga wa Red special force ugeze ko uri hafi kurangira. RSF(Red Special Force) ni umutwe w'akataraboneka ugizwe na zimwe mu nzobere zizewe zituruka muri  divisions zitandukanye, hamwe na ½ cya maneko zakoreraga hanze. Inshingano z’uyu mutwe ni ukwinjira mu baturage ku buryo nta myivumbagatanyo ishobora kuzabaho. Uwabigerageza tuzaba twamuteye imboni duhite tumurangiza. Hari na bamwe mu ntore bamaze kujyanwa guhabwa inyigisho zo kwinjira muri uyu mutwe. Bivuze ko mu gihe gito cyane, ba executifs b’imirenge n’utugari bazahindurwa hinjiremo inzobere za RSF.

Ikindi ni uko imirwanire y’intambara tugiye kurwana izaba itandukane cyane n'isanzwe. Mbere twakoreshaga ambush(kubikira umwanzi ukamuniga, ukamucumita umusingi w’imbunda yagucika ukamubara urusoro) na W (kugota ugasigira umwanzi inzira imusohora ariko ugenda umurasa ruhenu). 

Ubu noneho tuzajya dukoresha strategies yitwa Mix, bisobanuye ko tuzivangavanga n’abaturage ku buryo za gunships zidashobora kuturasaho ariko twe tukaba twazihanura kuko zidashobora kurasa mu baturage. Ziramutse zirashe abaturage, Kagame yahita atabaza ibindi bihugu bihora bimusaba ko bakorana nka Russia na China maze bikotsa igitutu ONU ngo yitambike, yakwanga bakaza gutabara Kagame byitwa ko abamurwanya bari gukora Genocide.

Mwitegure umukino, nako umuriro.
Nkaba narangiza nibutsa abahutu bihaye guheka impyisi biyibagije ko igira amenyo nako ari bihehe, ko mu gihe gito bazaba bari mu kaga. Gusa nabo si ba mwana kuko amashuli bamwe bize abatareba kure bumva ko bayapfushije ubusa ariko nkanjye wiyizera mu buryo buhanitse, sinemeranya n’abo bantu.

Umpakanya nafate urugero rwa Dogiteri Ntawukuriryayo Damaseni. Abenshi bavuze ko uyu mugabo amashuli yize yayapfushije ubusa, ubwo yabwiraga umunyamakuru wari umutunze mikoro igihe yari avuye ku ntebe y’icyubahiro agana ku gatebe gato mu badepite yayoboraga, niko kubwira umunyamakuru ko u Rwanda rutakiri igihugu, Kagame yamaze kurugira akarima ke(Ikigo cy’ubucuruzi). Mwibuke ko ubucuruzi bwose mu gihugu buri mu maboko ya FPR ariyo Rwanda rw'ubu, rukaba ari Kagame.

Uyu muhutu w’umuhanga ntiyahagarikiye aha gusa yakomeje azimiza nka wa munyenduga wa kera wigeze asubiza sebuja  w’umukiga ati uricyo ntazi igihe yari amubajije uti uzi icyo ndicyo sha.Umukiga, nka Kagame, yumvise ko umunyenduga amwise igihangage , byahe byo kajya ko na Ntawukuriryayo yarangije abwira Abanyarwanda bose ko Kagame ababwira amuzi neza. Ashaka kuvuga ko yamutegetse ku ngufu gusenya PSD, ko Kagame ari umwicanyi w’umujura , umunyagitugu ko ndetse kubana nawe ari amaburakindi wemera ugashora imigabane muri cya sosiyete cye Rwanda.

Mu gihe cy’imanza z’abahutu bafashije Kagame kwica bene wabo babizi kandi babigambiriye, Ntawukuriryayo uru rubanza azarutsinda kuko aziregura avuga ko ubwe yagaragaje ko Kagame ayobora igihugu nk’akarima ke. Ko yabwiye abanyarwanda ku mugaragaro ko Kagame amuzi neza ari umwicanyi.

Uzahura n’ibibazo ni cya Rucagu, niba Kagame atakivuganye kizarya iminwa kuko n'iyo cyakwiregura kivuga ko Kagame yagitegetse kumwambara, urukiko ruzakibaza impamvu nibura kitashyizeho agafoto ka Mandela ngo kigaragarize uwo mwicanyi ko akwiriye kwikosora agakora nk’iriya Ntwari.

Simvuze Bamporiki kuko azaba arira atera agahinda nk’uko ahorana amarira atubeshya ko kuba umuhutu bimutera ipfunwe. Kikagirango hari uwita ku marira yacyo cyangwa ibyo gihomvora . Reka tugikamure nikimara kuba imbetezi niho kizamenya uwo kisunze uwo ari we mu gihe abahungu bazaba bagitaba ari kizima. N'iyo cyarokoka bizakibera ikizami kirirwa gipakira ibijumba mu mazuru ngo cyongere kuyagura nk’uko yahoze mbere yo kuyakurura kigira umututsi ku ngufu.
Kuyavuga siko kuyamara ni aho ubutaha.

Uwanyu Paul Mbangurunuka
Kigali - Rwanda
Shikamaye.blogspot.com
NB: Iyi nkuru mushobora kuyigeza kubindi binyamakuru byose ntabashije kubonera address .

No comments:

Post a Comment

Muvandimwe, nshuti ya SHIKAMA, turagushimira cyane umuganda utanga wo kubaka URWANDA rushya ubinyujije mu bitekerezo byawe( Komanteri). Kugirango turwanye urukungu rw'Agatsiko ni ngombwa ko buri komanteri ibanza gusuzumwa. Yohereze, irahita ijya ku rubuga mu minota mike niba idatandukira( kuvuga ibitajyanye n'inyandiko), itukana, cyangwa yuzuyemo uburere buke.

Wipfusha komanteri yawe ubusa ukoresha "ANONYMOUS", himba izina urikomeze kuko hari ibihembo mu Kuboza 2016 ku bantu 3 bazaba babaye indashyikirwa mu gutanga ibitekerezo. Dukomeje kubashimira ubwitange n'umurava muhorana. IMANA Y'I RWANDA ihorane namwe iminsi yose.

Dg NKUSI Yozefu
www.shikamaye.blogspot.com
Uharanire ko Ukuri gusimbura ikinyoma.
Email: mahoriwacu@gmail.com; tel: +4745564355