Pageviews all the time

Mu gihe Pawulo Kagame yirirwa abuyera amahanga kubera umurengwe n'inama z'abaganga tutibagiwe n'iz'Abanyamerika, Abongereza n'Abagande bibumbiye muri PAC, IBIHUHA bikomeje guhutera mu Rwanda/Nkusi Yozefu






Dubai yasimbuye Washington DC, New York, Los Angeles na Sacramento
Abantu bari bamenyereye ko Pawulo Kagame agomba kuba ari muri Leta Zunze Ubumwe z'Amerika byibura iminsi 3 mu cyumweru. Kagame ubu yahinduye uburuhukiro kuko iminsi ye myinshi mu cyumweru ayimara ubu mu bihugu byiyuze by'Abarabu, ahazwi cyane muri ibi bihugu hakaba ari muri DUBAI aho Kagame Pawulo aruhukira byibura iminsi ibiri mu cyumweru.

Umuherwe Pawulo Kagame n'utegeka Dubai
bariho baryoha. umenya aha bararebaga ubwirakabiri!

Abakurikirana ibya Pawulo Kagame bemeza ko muganga umukurikirana umunsi ku wundi, yasanze ngo yararenzwe n'ibibazo agomba kuzajya ahora hanze mu rwego rwo kurangaza ubwonko naho ubundi ngo ashobora kwiruka ku musozi amanywa ava! Nkuko Shikama idasiba kubibagezaho, si izi nama za muganga ariko zituma mwene Rutagambwa ahora mu rubuyero kuko abikora no mu rwego rwo kwihesha agaciro akabonana n'abandi bakize nkawe ku isi bakayaga bibaza icyo Imana yahoye abakene bakaba bameze uko bameze! Hiyongeraho kandi n'inama z'abacanshuro bo muri Amerika(USA), Ubwongereza n'Ubugande bibumbiye muri PAC nabo basanga uwabagabiye agomba kuruhuka bakamutegekera abaja n'abagaragu bafatanya kugira ingaruzwamuheto.

Abanyarwanda babaye impehe 
 Impehe mu kinyarwana bivuga Inzuki zitagira urwiru; izi nzuki mubyo ukuri ntacyo zishobora kugeraho kuko buri rwose ruba nyamwigendaho rugaharanira kwibonera ibyo rurya rutegereje urupfu. Ibi bikaba bitandukanye n'iyo inzuki zifite urwiru kuko zihuriza ibikorwa byazo hamwe byo gukora ubuki bwo gutunga ibyana mu binyagu bituruka ku magi aterwa n'urwiru. Buri rwose ruba rufite akazi rushinzwe: iziduhira zishyira umwuka mwiza mu cyima, izirinda icyima n'izitara ibiribwa; uku gushyira hamwe kw' inzuki niko dukesha ubuki bukundwa n'umuntu wese.

Kuva uwiyita umwami w'u Rwanda rero we adakora nka ruriya rwiru ahubwo agakora nk'impehe, abo ategeka nabo bose babaye nk'impehe. Abahingaga, abenshi barabiretse bigira mubyo kuragura cyangwa gusenga Imana y'i Rwanda n'iyo muri Irisayeli, abari batunzwe n'imirimo y'amaboko ubu bayivuyeho bakaba bitungiwe no gutera Gatarina(soma hano ibibera mu turere bisa n'ibyabereye i Ndera mu minsi ishize).Abangombaga kuba abagore ejo babishingutsemo ubu abenshi bayobotse uburaya n'ikimansuro FPR yadukuriye muri Uganda muri 1990. Abasore bagombaga kuvamo abagabo b'ejo hafi ya bose ubu bahinduka abapfubuzi bakirangiza ingirwa kaminuza basokamo batazi gusoma no kwandika!

Aho Abanyamakuru bakora buhehe, harangwa Ibihuha
Mu gihe icyitwa itangazamakuru ryigenga cyitigeze kibaho kuva Kagame yakwicara mu Rugwiro, nta handi abanyarwanda bakura amakuru bashobora kwizera atari mu itangazamakuru ubwabo bikorera buhehe! Ni muri urwo rwego ubu aho uciye hose mu Rwanda uhura n'ibi bihuha bihutera!

Uriya ati: 
"Waramutse sha, wari uzi ko bya bitero biherutse kugabwa i Ndera mu cyumweru gishize burya byari byagabwe na FPR n'inzego zishinzwe umutekano wa Kagame kuko Masaka na Ndera ariho ingabo za FPR-Inkotanyi zashinze ibirindiro zihanura indege ya Kinani kitananiye abanzi n'abagambanyi muri1994?"
Ati :"ibi babikoreye kugirango bakubure aka gace, kugira ngo hatazagira uhanura Pawulo yiviriye mu ngoro ye iri kuri Muhazi cyangwa  gutembera mu mahanga."

Urumirwa ukifata ku munwa uti wenda uyu yaba ari gatumwa, ukikomereza urugendo; waba utararenga umutaru, undi akaba araguhamagaye ati 
"Ese uzi n'ibindi, wari uzi ko Pawulo Kagame bari bamukoreye kudeta, mu kirundi babyita gukombora." 
Uti :"uwo mugiraneza wari ukoze icyo gikorwa cy'indashyikirwa ninde?" Ati :"simbizi neza, ngo ni abasoda bakuru, ariko icyo nzi ni uko mu mupira wa Mali na RDCongo wo kurangiza CHAN ariho Kagame yabimenyeye abibwiwe na jenerali Kagame Alegisi yahise ashinga kumurinda abandi basirikare benshi bakaba bafunze abandi yabahinduriye imyanya!" Uti: " bafungiye he ? "Ati: " Ntumbaze, ese wowe ntabwo wabonye ko yari yamanjiriwe muri Sitade yifashe mapfubyi?" "Uti nde?;  akarebaguzwa hirya hino akakongorera ati : " Kaganga"  Iyo uri umututsi urakomeza ukabaza ariko iyo uri umuhutu, wibuka wa mugani wacu ugira uti " Nyiri gitwe kinini akirinda imijugujugu" maze ukikuriramo akawe karenge!

Ibihuha ko hari Imana ziva hanze zifasha abanyarwanda
Kuva Gitwaza Pawulo yakwikorera ibyaha by'Agatsiko akajya kubitura imana yo muri Israel nkuko Shikama yigeze kubagezaho inkuru yerekeranye n'uru rugendo, abanyarwanda basanzwe twarategereje ngo atubwire uko byamugendekeye ngo tumuhe n'ibyacu abijyaneyo ariko amaso yaheze mu kirere. Amakuru Shikama ikura ahantu hizewe avuga ko uyu Gitwaza akimara gutura biriya byaha by'Agatsiko, yahise ahungira aka Gatsiko muri Leta Zunze ubumwe z'Amerika(USA).

Umwe mu banyamadini nawe ukora buhehe, yize umutwe maze we asanga gukora nka Gitwaza nta ritubutse yakama mu biyita ABAKIRISITO! Yarakugendeye yubaka urukuta rw'amabuye, yumvisha abantu ko yakoresheje igitaka kivuye muri Israel si ukuyobokwa karahava! Ubu amaturo ni yose ku bantu baza gusenga BUYAHUDI begamye kuri urwo rukuta batakambira Imana y'i Rwanda n'iy'aho icyo gitaka cyaturutse ngo zibakize Agatsiko. Nyiri uyu mushinga ariyimbire ariko niba ataratanze icyacumi muri FPR kuko izamubaza ubuziranenge bw'igitaka cye nabubona imubaze niba yaragitangiye amahoro kuri gasutamo, nabona ibyo byangombwa byombi imubaze uwamuhaye uburengenzira bwo gutumiza icyo gitaka!
Babwiwe ko uru rukuta rwubakishije igitaka cyavuye muri Israel bararuyoboka
ngo barwikingeho amahuhwezi y'ibihuha

Ikinani Kitananiye abanzi n'abagambanyi cyajyaga kitubwira Inyenzi nako Inkotanyi zitaratugira ingaruzwamuheto kiti:"Mwagiye mumenya uko mureshya; umukobwa wese, umukobwa wese ngo agatimba!". Mu gihe Pawulo Kagame abamutegekera bamubwiye ko kubaho mu mudamararo aribyo bizamuruhutsa mu mutwe bikamurinda ibisazi, abanyarwanda ba giseseka Imana natwe ntiyadutereranye iduha aho twikinga amahuhwezi y'ibihuha iduha utwubakira urukuta; ariko byari kuba byiza iyo akoresha kariyeri yacu dore ko FPR ngo yamaze nayo kuyibaruza ngo ibyazwe iritubutse! 

Dg NKUSI Yozefu
www.shikamaye.blogspot.com
Muzamenya Ukuri maze kubabohore



No comments:

Post a Comment

Muvandimwe, nshuti ya SHIKAMA, turagushimira cyane umuganda utanga wo kubaka URWANDA rushya ubinyujije mu bitekerezo byawe( Komanteri). Kugirango turwanye urukungu rw'Agatsiko ni ngombwa ko buri komanteri ibanza gusuzumwa. Yohereze, irahita ijya ku rubuga mu minota mike niba idatandukira( kuvuga ibitajyanye n'inyandiko), itukana, cyangwa yuzuyemo uburere buke.

Wipfusha komanteri yawe ubusa ukoresha "ANONYMOUS", himba izina urikomeze kuko hari ibihembo mu Kuboza 2016 ku bantu 3 bazaba babaye indashyikirwa mu gutanga ibitekerezo. Dukomeje kubashimira ubwitange n'umurava muhorana. IMANA Y'I RWANDA ihorane namwe iminsi yose.

Dg NKUSI Yozefu
www.shikamaye.blogspot.com
Uharanire ko Ukuri gusimbura ikinyoma.
Email: mahoriwacu@gmail.com; tel: +4745564355